የቤተ ክርስቲያኒቱ እሴቶች

ቤተ ክርስቲያኒቱ የአስተምሮዋ፣ የደንቦቿ፣ የልማዶቿና የእሴቶቿ መሠረት፣ ምንጭና መሪ የብሉይና የአዲስ ኪዳን ቅዱሳት መጻሕፍት ናቸው። ቤተ ክርስቲያኒቱ ቅዱሳት መጻሕፍት የሚያበረታቷቸውን እሴቶች ታበረታታለች፣ ቅዱሳት መጻሕፍት የሚያወግዟቸውንም እሴቶች ታወግዛለች።
የቤተ ክርስቲያኒቱ እሴቶች የቤተ ክርስቲያኒቱን መሠረተ እምነት በመከተል በየጊዜው እያደገና እየሰፋ ለሚሄደው አገልግሎቱ እንደ መርህ የሚወሰዱ የክርስቲያናዊ እምነትና ኑሮ ዋና ዋና እሴቶቹ የሚከተሉት ናቸው፦

1. ግብረ ገባዊ (የሞራል) አቋሟን በተመለከተ
   • ሰዎች ሁሉ በእግዚአብሔር አምሳል ወንድና ሴት ሆነው እንደተፈጠሩ (ዘፍጥረት 1፡27) እና ከዚህም የተነሳ በሁሉም አቅጣጫ ፍቅር፣ ፍትሕ፣ እኩልነት፣ እንክብካቤ፣ ክብርና ጥበቃ ማግኘት እንደሚገባቸው ቤተ ክርስቲያኒቱ ታምናለች፣ በአጽንዖትም ታረጋግጣለች።
   • ቤተ ክርስቲያኒቱ ቤተሰብ የሚመሠረተው የሁሉ ፈጣሪ የሆነው እግዚአብሔር አስቀድሞ በባረከው ቅዱስ ጋብቻ (ዘፍጥረት 2፡22፣24) በአንድ ወንድና በአንድት ሴት መካከል በሚፈጠር የቃል ኪዳን አንድነት መሆኑን ታምናለች፣ ይህንኑ ታጸናለች።
   • ሰዎች ሁሉ የየራሳቸው ማንነት፣ ባህል፣ ቋንቋና እሴቶች ያሏቸው እንደሆኑና ከእግዚአብሔር የተሰጣቸው ተፈጥሯዊ ነጻነት በማንኛውም ግለሰብ ወይም ቡድን ወይም ሥርዓት ሳይሸራረፍ ወይም ሳይጣስ በሰላምና በስምምነት አብረው የመኖር መብት እንዳላቸው ታምናለች። ባህሎች ከቤተ ክርስቲያኒቱ መሠረተ እምነትና ከቃለ እግዚአብሔር ጋር እስካልተጋጩ ድረስ በውል እንዲታወቁና እንዲከበሩም ትጥራለች።
2. ቤተ ክርስቲያኒቱ ስለሰዎች ያላት አቋም
   • ቤተ ክርስቲያኒቱ በመጽሐፍ ቅዱሳዊ አስተምሮ መሠረት፣ ሰዎች ሁሉ በእግዚአብሔር አምሳል የተፈጠሩ ቢሆንም በኀጢአት በመውደቃቸው ምክንያት በእግዚአብሔር ቁጣና ፍርድ ሥር መሆናቸውን ታምለች፣ አበክራም ታስታውቃለች። ኀጢአታቸውንም በመናዘዝና በክርስቶስ ለሚያምኑ ሁሉ በተሰጠው ፀጋ ኀጢአተኞች ሁሉ ቤዛነትንና የዘላለምን ህይወት በእምነት መቀበል እንደሚችሉም ታምናለች፣ ይህንኑም ታረጋግጣለች።
   • ቤዛነትንና የዘላለምን ህይወት የተቀበለ የእግዚአብሔር ሰው ሁሉ እግዚአብሔርን ለመወደድና ለማምለክ፣ እንዲሁም ባልንጀሮቹን ለመውደድና ለማገልገል የተጠራ መሆኑን ታምናለች።
   • ለፍትሕ፣ ለሰብዓዊ መብት፣ ለሰላም፣ ለእውነት፣ ለዕርቅና በመቻቻል አብሮ ለመኖር እንዲሁም ለልማትና ለዕድገት ትብብር በመቆም ለሰዎች ሁሉ ለተፈጥሮ ያላትን ክርስቲያናዊ ፍቅርና እንክብካቤ ትገልጻለች።